കൊച്ചി: കോണ്‍ഗ്രസ് ക്രൈം സിന്‍ഡിക്കേറ്റിന്റെ പിടിയിലാണെന്ന് എ എ റഹീം എംപി. യുവ നേതാക്കളാണ് ഈ സിന്‍ഡിക്കേറ്റില്‍ ഉളളതെന്നും പണവും അധികാരവുമുളള അവരെ കോണ്‍ഗ്രസിലെ സീനിയര്‍ നേതാക്കള്‍ക്ക് പോലും ഭയമാണെന്നും എ എ റഹീം പറഞ്ഞു. 'ആ ക്രൈം സിന്‍ഡിക്കേറ്റിന്റെ നേതൃത്വത്തിലാണ് മുഴുവന്‍ പിആര്‍ വര്‍ക്കുകളും നടക്കുന്നത്. രാഹുല്‍ മാങ്കൂട്ടത്തിലിനെ ഇപ്പോള്‍ ഒളിവില്‍ സംരക്ഷിക്കുന്നതും അവരുടെ നേതൃത്വത്തിലാണ്. കര്‍ണാടകയിലെയും തെലങ്കാനയിലെയും അധികാരം പോലും അവര്‍ ഉപയോഗിക്കുന്നുണ്ട്. സ്വന്തം ബിസിനസുകളും അതിലൂടെ വളര്‍ത്തുന്നുണ്ട്': എ എ റഹീം പറഞ്ഞു.
ഇതിനിടെ മുഖ്യമന്ത്രിക്ക് യുവതി പരാതി നൽകിയതിന് പിന്നാലെ രാഹുൽ മാങ്കൂട്ടത്തിൽ മുൻകൂർ ജാമ്യാപേക്ഷ സമർപ്പിച്ചിരുന്നു. യുവതി മുഖ്യമന്ത്രിക്ക് പരാതി നൽകിയെന്ന വിവരം പുറത്ത് വന്നത് മുതൽ രാഹുൽ മാങ്കൂട്ടത്തിൽ എംഎൽഎ ഒളിവിലാണ്. രാഹുലിന്റെയും അസിസ്റ്റന്റിന്റെയും മൊബൈല്‍ ഫോണുകള്‍ സ്വിച്ച് ഓഫാണ്. മുന്‍കൂര്‍ ജാമ്യാപേക്ഷയ്ക്ക് തടസ്സമാകുമെന്നതിനാല്‍ കേരളത്തിന് പുറത്തേക്ക് രാഹുല്‍ മാങ്കൂട്ടത്തില്‍ പോകാന്‍ സാധ്യതയില്ലെന്നാണ് വിലയിരുത്തല്‍. രാഹുലിന്റെ ഔദ്യോഗിക വാഹനം പാലക്കാട്ടെ ഫ്‌ളാറ്റിലുണ്ട്. രാഹുല്‍ പാലക്കാട്ടെ രഹസ്യകേന്ദ്രത്തില്‍ തന്നെയുണ്ടെന്നാണ് വിവരം. രാഹുലിനെ കണ്ടെത്താൻ നിരീക്ഷണം ശക്തമാക്കിയിരിക്കുകയാണ് പൊലീസ്. നിരീക്ഷണം ശക്തമാക്കാന്‍ പാലക്കാട്, കൊച്ചി, തിരുവനന്തപുരം സ്റ്റേഷനുകള്‍ക്ക് നിര്‍ദേശം നല്‍കിയിട്ടുണ്ട്.
അതേസമയം, പരാതിക്കാരിയുടെ വൈദ്യപരിശോധന പൂര്‍ത്തിയാക്കി. രഹസ്യമൊഴി രേഖപ്പെടുത്തിയതിന് പിന്നാലെയാണ് വൈദ്യപരിശോധന നടത്തിയത്. പരാതിക്കാരിയുടെ സുഹൃത്തുക്കളുടെയും ചികിത്സിച്ച ഡോക്ടറുടെയും മൊഴിയെടുക്കും. ഇന്ന് മുതല്‍ മൊഴിയെടുപ്പ് തുടങ്ങാനാണ് പൊലീസ് നീക്കം. യുവതിയുടെ മൊബൈല്‍ ഫോണ്‍ ശാസ്ത്രീയ പരിശോധനയ്ക്ക് അയക്കും. കേസിലെ രണ്ടാം പ്രതിയും രാഹുലിന്റെ ഉറ്റ സുഹൃത്തുമായ ജോബി ജോസഫും ഇന്ന് മുന്‍കൂര്‍ ജാമ്യാപേക്ഷ നല്‍കിയേക്കും.
Content Highlights: Congress in the grip of crime syndicate, They are protecting rahul mamkoottathil says a a rahim